Recipe : हिवाळा स्पेशल… बाजरीची खिचडी

माधवी जोशी माहुलकर

माझी आई सुगरण होती. तिने केलेला रोजचा साधा स्वयंपाकही खूप रुचकर असायचा. मसालेदार भाज्यांचे प्रकार असो किंवा नैवेद्याचे कांदा-लसूणविरहित पदार्थ असोत तिच्या हातच्या स्वयंपाकाला कशाचीच सर येत नसे. त्यातीलच एक प्रकार म्हणजे बाजरीची खिचडी! ही खिचडी करण्यात तिचा हातखंडा होता. ती बाजरीची खिचडी आणि कढी इतकी सुंदर करायची की, खाणाऱ्याने बोटं चाखत राहावी आणि पोटभर खाऊन देखील अतृप्त रहावे!

साहित्य

• बाजरीचा भरडा – 2 वाट्या
• तांदूळ – 1 वाटी (तांदूळ कमी हवे असतील तर भरडा जास्त घ्यावा.)
• तूरडाळ – अर्धी वाटी
• शेंगदाणे – 1 वाटी
• हिरवी मिरची, आले, लसूण पेस्ट
• कढीपत्ता – 6 ते 7 पाने
• लाल तिखट – 2 चमचे
• हळद – 1 चमचा
• मीठ – चवीनुसार
• गोडा मसाला – 2 चमचे
• धणे  – 1 लहान चमचा (हातावर भरडलेले)
• जिरे – 1 लहान चमचा (हातावर भरडलेले)
• मोहरी – 1 लहान चमचा
• हिंग – 1 लहान चमचा
• दालचिनी – 1 छोटा तुकडा
• तेजपान – 1
• तेल – 2 पळी
• तूप – 1 चमचा

हेही वाचा – Recipe : विदर्भ स्पेशल… गोळाभात

कृती

1. प्रथम बाजरीचा भरडा, तांदूळ आणि तूरडाळ पाण्याने धुऊन घ्यावी.
2. एका भांड्यात एक ते दीड पळी तेल गरम करून फोडणी तयार करावी.
3. मोहरी, जिरं तडतडल्यावर हिंग टाकून कढीपत्ता, धणे, जिऱ्याची भरडपुड टाकावा. नंतर दालचिनीचा तुकडा आणि तेजपान टाकावे
4. आता त्यामध्ये हिरवी मिरची, लसूण आणि आल्याची पेस्ट टाकून शेंगदाणे घालावे व छान परतावे.
5. एक चमचा हळद टाकून त्यामध्ये दोन चमचे लाल तिखट टाकावे आणि थोडे पाणी घालून दोन मिनिटे गॅसच्या मंद आचेवर ठेवावे.
6. वाफ यायला लागली की, बाजरीचा भरडा, तांदूळ आणि डाळीचे मिश्रण भांड्यात टाकावे.
7. भांड्यात मीठ टाकून सर्व मिश्रण एकदा छान परतून घ्यावे.
8. त्यानंतर वरून दोन चमचे गोडा मसाला घालावा आणि चार ते पाच वाट्या पाणी घालून मध्यम आचेवर खिचडी छान मऊसूत होईपर्यंत शिजवून घ्यावी.
9. खिचडी शिजली की, कडेने थोडे तूप सोडावे आणि आवडत असेल तर अर्धे लिंबू पिळावे.

हेही वाचा – Recipe : बटर फणस हंडी

टीप्स

• भरडा तयार करण्यासाठी बाजरी आदल्या दिवशी स्वच्छ पाण्याने धुऊन रात्रभर पाण्यात भिजत घालावी. बाजरी हा मिलेटचा प्रकार असल्यामुळे ती लवकर फुगत नाही त्यामुळे साधारण 9 तास तरी बाजरी भिजायला हवी. दुसऱ्या दिवशी पाण्यातून बाजरी उपसून स्वच्छ कापडावर वाळवावी. बाजरी वाळली की, तिला खलबत्त्यात अगर मिक्सरवर जाडसर दळावे आणि सुपाने पाखडून त्यातील तूस काढून घ्यावे.
• खिचडी सरबरीत हवी असेल तर, एखादी वाटी पाणी जास्त घालू शकता.
• खिचडीवर वरून घ्यायला सुक्या लाल मिर्च्या आणि लसणाची जिरे-मोहरी घालून खमंग अशी फोडणी तयार करावी आणि अशी ही चुरचुरीत लसणाची फोडणी गरमागरम खिचडीवर घेऊन कढी, पापड, लोणचे पानात घेऊन त्याचा आस्वाद घ्यावा.
• बाजरीच्या खिचडीत आवडत असल्यास फ्लॅावर, गाजर, फरसबी, मटार वापरू शकता.
• बाजरीची खिचडी नेहमी हिवाळ्यात खाणे कधीही चांगले.

एकूण कालावधी – साधारणणे एक तास

पुरवठा संख्या –  चार व्यक्तींसाठी

तुमच्याही रुचकर आणि वैशिष्ट्यपूर्ण रेसिपी असतील तर, त्या तुम्ही ‘अवांतर’साठी देऊ शकता.

avaantar.recipe@gmail.com

या ईमेलवर किंवा

9869975883 या व्हॉट्सॲप क्रमांकावर

तुम्ही रेसिपी पाठवा, तुमच्या नावासह या वेबसाइटवर त्या प्रसिद्ध केल्या जातील.

तथापि, त्यासाठी तुम्हाला वरील फॉरमॅटमध्ये ही रेसिपी द्यावी लागेल.